Quba rayon Mərkəzi kitabxanası

Quba rayon MKS
Tədbirlər
29 Mart , 2021
29.03.2021-ci il tarixində Xaçmaz Regional Mədəniyyət İdarəsi Quba rayon Mərkəzləşdirilmiş Kitabxana Sisteminin mərkəzi kitabxanasının və Quba  Soyqırımı Memorial Kompleksinin birgə təşkilatçılığı ilə 31 mart Azərbaycanlıların Soyqırımı Günü ilə əlaqədar “İnsanlığa sığmayan cinayət" adlı onlayn tədbir keçirildi. Tədbirdə Mərkəzi kitabxananın əməkdaşları, Quba Soyqırımı Memorial Kompleksinin əməkdaşları və fəal oxucular iştirak edirdi. Əvvəlcə Soyqırımı qurbanlarının və torpaqlarımızın azadlığı, suverenliyi uğrunda canlarından keçən qəhrəman şəhidlərimizin əziz xatirəsi bir dəqiqəlik sükutla yad edildi. Daha sonra “Qan yaddaşı 1918-ci ilin mart qırğınları" adlı videoçarx nümayiş etdirildi.  MKS-nin direktoru Saməddin Nəsirov onlayn tədbirdə çıxış edərək bildirdi ki, zaman-zaman ermənilər tərəfindən azərbaycanlılara qarşı məqsədyönlü şəkildə etnik təmizləmə və soyqırımı siyasəti həyata keçirilmişdir. Getdikcə gücləndirilən və xalqımızı ağır məhrumiyyətlərə məruz qoyan bu məkirli və qeyri-insani siyasət nəticəsində azərbaycanlılar min illər boyu yaşadıqları tarixi etnik torpaqlarından didərgin salınaraq kütləvi qırğınlara məruz qalmışlar. Sonra Quba Soyqırımı Memorial Kompleksinin direktoru, tarixçi alim Rəxşəndə xanım Bayramova çıxış edərək qeyd etdi ki, 1918-ci ildə ermənilərin Azərbaycan xalqına qarşı törətdikləri amansız soyqırımı hadisələrindən biri də Quba faciəsidir. Quba qırğınları Bakı, Şamaxı qətlianlarının davamı idi. Tədbirdə Quba Soyqırımı Memorial Kompleksinin elmi araşdırmalar şöbəsinin müdiri Lətafət Beybudova çıxış edərək bildirdi ki,1918-ci ildə Bakıda və Azərbaycanın digər bölgələrində ermənilərin törətdikləri qırğınlardan bir əsr ötməsinə baxmayaraq bu vəhşiliklər xalqımızın qan yaddaşında əbədi iz buraxmışdır. Daha sonra mərkəzi kitabxananın əməkdaşı Talehə Dəmirova çıxış edərək qeyd etdi ki, 1918-ci ildə erməni vandalları insanlara qarşı vəhşi amansızlıq etdikləri kimi, mədəniyyət abidələrini və tarixi abidələri də vəhşicəsinə dağıdır, məscidləri yandırır, memarlıq incisi sayılan binaları yerlə-yeksan edirdilər.
Foto Qalereya